-Բարև…
— Բարև…
— Ինչպե՞ս ես…
— Լավ, դո՞ւ…
— Փորձում եմ լավ լինել:
— Առողջանո՞ւմ ես:
-Երևի… Ինչո՞ւ չես քնում:
— Չգիտեմ…
— Բարկացած ու նեղված ես թվում…
— Չէ, ոչ մի նման բան…
— Ի՞նչ ես անում:
— Ոչինչ… պառկած եմ:
— Բայց դա անելիք չէ… դա իրավիճակ է:
-Թող լինի այդպես:
— Բայց դրանք տարբեր բաներ են:
— Ցանկանում ես իմանալ` ինչո՞վ եմ զբաղված: Դատարկությամբ…
— Իսկ եթե փորձեմ դատարկությունդ լցնե՞լ…
— Զրուցի~ր հետս…
— Թեմա առաջարկիր:
— Ախր ասացի, չէ՞… Դատարկություն է…
— Ինչո՞ւ…գիտե՞ս…
— Բնավ:
-Ես ասե՞մ…
-Հա…
-Դու սիրում ես դատարկությունը, հոգիդ անչափ սիրում է այն, այլապես ինքդ ելքեր կորոնեիր` դուրս գալու այդ իրավիճակից:
— Երբեք թեմա չեմ առաջարկում: Ըհն, կարծես թե սիրում եմ մենակությունը:
-Իսկ եթե ինքս թեմաներն առաջարկե՞մ… կընտրե՞ս:
— Փորձենք:
— Ատելություն, դավաճանություն, հավատարմություն… մմմմմ, սեքս, կյանք, հարգանք, վրեժ, զիջում…դե՞…
— Զղջում…
-Կա՞ մի բան, որի համար խիստ զղջում ես (Առաջընթա~ց… թեման ինքդ ասացիր…):
— Հա, շատ բաների համար եմ զղջում:
-Ե՞վ:
— (Ինչպե՞ս ես ինձ ստիպում հոգիս բացել քո առաջ) Որովհետև ամեն ինչ աննպատակ է:Մենք աննպատակ ենք ապրում, օր ենք մեռցնում, քարշ ենք տալիս սեփական գոյությունը:
— Կձևացնեմ, որ այդ հիմար միտքը չարտահայտեցիր:
— Ինչո՞վ էր հիմար:
— Դու նպատակ չունե՞ս: Ոչ մի տեսակի՞:
-Չէ:
— Օրինակ` չե՞ս ցանկանում սիրվել:
— Ոչ: Սիրելու ընդունակ չեմ:
— Ձեր պատասխանը սխալ է: Դու չես ուզում սիրել պարզապես:
— Չեմ ուզում: Ես մեղավոր եմ ինձ զգում կիսատ մնացած սերերիս համար:
— Պիտի ցանկանաս սիրել:
— Մարդիկ ինձ սիրում են, որովհետև ես իրենց պետք եմ:
— Մարդիկ քեզ սիրում են, որովհետև կարողանում են քեզ օգտագործել:
— Եվ ես իրապես արժանի եմ դրան: Ես ինքս եմ թույլ տալիս, որ ինձ ուզած կերպ օգտագործեն… օգտագործեն զգացմունքներս, անձս, հատկանիշներս, ինտելեկտս…
— Բայց դու ինքդ ես թույլ տվել: Դու ցանկացել ես, որ քեզ օգտագործեն:
— Հավանաբար… ինձ բնորոշ է դրամատիկ կերպարը:
— Կցանկանայի՞ր ամուսնանալ:
— Օ~, ոչ…. Ես բոլորովին պիտանի չեմ ամուսնության համար: Չափազանց էգոիստ եմ ամուսնանալու համար: Ես անկայուն մարդ եմ, կարող եմ ընտանիքիս լքել, երբ խելքիս փչի, կարող եմ սիրահարվել ուրիշ տղամարդու և նոր սիրահարի նման լքել ամուսնուս:
— Դու չե՞ս ցանկանում ապրել այն մեկի համար, ում համար պարտավոր ես ապրել:
-Ուզում եմ:
— Ահա նպատակ համար 1-ը:
— Փորձում ես իմաստ հաղորդել կյանքիս… իզուր…
— Բացարձակ… ուղղակի քայլում ենք իրար կողքի, զրուցում միմյանց հետ: Իսկ ենթադրելն ու եզրահանգումները թողնում եմ քեզ:
— Մենակությունից լավ բան չկա:
— Իսկապե՞ս… էլ ինչո՞ւ ես ապրում:
— Չեմ ապրում… ամեն օր 11 լիտր ավելորդ թթվածին եմ շնչում:
— Ինքնապատասխանի՞չ ես…
— Ինչո՞վ եմ տարբերվում ինքնապատասխանիչից:
— Որ կենդանի էակ ես…
— Հակառակը… անկենդան եմ…
— Երանի գժերին, որ էլ չեն գժվի… Սևակ կարդացե՞լ ես…
— Հա… չեմ սիրում Սևակ:
— Տանդ մոտակայքում կամուրջ կա՞:
— Ոչ, ինչո՞ւ: Ինքնասպանությա՞ն ես դրդում:
— Ամենևին, ցանկանում եմ վերացնել այն, քանի քո այդ դեռահասի ուղեղով կյանքդ չես կործանել:
— Նման քայլի երբեք չեմ գնա: Դա իմ արժեքներից դուրս է:
— Ավելի լավ… Կյանքի հաճույքը ինչո՞ւմ է կայանում:
— Կյանքի հաճույքը սերն է: Հըմ, ավելի շուտ, արժեհամակարգի հարց կա:
— Սե՞րը…Հավանաբար երբեք իրական սեր չես զգացել, եթե սերը քեզ համար հաճույք է:
— Մի՞թե սիրելուց ու սիրվելուց առավել մեծ հաճույք կա աշխարհում: Սեր հակառակ սեռի, ընտանիքիդ անդամների, ընկերներիդ, կենդանիների, բնության, ամեն ինչի հանդեպ… ամեն բանի հանդեպ սերը իսկական հաճույք է…
— Դա հենց կյանքն է, որ կա:
— Թեկուզ… ես պարզապես ապրել եմ ուզում, միայն ապրել:
— (Նպատակ համար 2) Իսկ ինչպե՞ս ես ապրում:
— Քնել եմ ուզում…
— Խուսափում ես… ինձնի՞ց, թե՞ քեզնից…
— Դե հերիք է փորփրես ինձ…
— Դու ինքդ ես քեզ փորում: Դու ինքդ խնդրեցիր զրուցել քեզ հետ:
— Իսկ հիմա խնդրում եմ, որ լռես, քնել եմ ուզում…
— Շատ լավ: Երբ կարիքս ունենաս, գիտես` ինչպես գտնես ինձ:
— Ես քեզ երբեք չեմ փնտրի:
— Դա քո ընտրությունն է: Բայց մի օր վերադառնալու ես` մտքերիցդ ու զգացմունքներիցդ խեղդված, ու խնդրելու ես, որ փորեմ քեզ….Անձամբ…
Ձեր գրառումը տեղ գտավ http://www.BlogNews.am կայքում: Շնորհակալություն:
Շատ հետաքրքիր էր… հեղինակայի՞ն է 🙂
իհարկե 🙂
Կարո՞ղ եմ մի բան առաջարկել ։))
Անկասկած 🙂
Օրինակ ես ստիպուած 2 անգամ կարդացի 😀 պահի տակ մոռանում էի, դուք էիք խօսում, թէ Ձեզ զրուցակիցը… չէի՞ք աւելացնի, ասենք՝ Ես — Ինքը… Երեւի աւելի հեշտ կը լինի այդպէս կարդալը։
Բայց դէ՝ Cool!
Thanks 🙂 Իսկ երկրորդ անգամ ավելի լավ հասկացաք ))))
Անկասկած 🙂